ಶಹರದಲ್ಲಿ ಹದಿಹರೆಯ

ನಾನು ಮುಂಬೈಯಲ್ಲಿದ್ದಾಗ ಬರೆದ ಪದ್ಯ ಇದು. ಪ್ರವಾದಿಯ ಕನಸು ಸಂಕಲನದಲ್ಲಿ ಇದು ಪ್ರಕಟವಾಗಿದೆ.

ಕೋಣೆಯ ಮಧ್ಯೆ
ಗೋಡೆ ಬಿತ್ತಿ
ಮನೆಗಳ ಬೆಳೆ ತೆಗೆವ ಶಹರದಲ್ಲಿ
ಹದಿಹರೆಯ ಕಾಲಿರಿಸಿ
ಮರಗಿಡಗಳ ನೆನಪು ಹುಟ್ಟಿಸುವುದು!

ಪ್ರಾಯದ ತೆನೆ ತೂಗಿ ಬಾಗುವ ಮಕ್ಕಳು
ಬಿಸಿಯುಸಿರಗರೆದರೆಂದು
ಕನಸಿನಲ್ಲಿ ಬೆಚ್ಚಿ
ತಾಯಿ ದೀಪ ಹಚ್ಚಿ ಕೂರುವಳು

ಕತ್ತಲಲ್ಲಿ ಬೆವರುತ್ತಾ
ನಿದ್ದೆ ಹೋದ ಹೆಣ್ಣು ಮಗಳು
ಸ್ವಪ್ನದ ಹಿತ್ತಲಲ್ಲಿ
ಜಾತ್ರ್ರೆ ಹೂಡಿದ್ದ
ಏಕಾಂತದ ಜತೆ ವ್ಯಾಪಾರಕ್ಕಿಳಿದು
ತನಗೆ ತಾನೆ ನಗುವಳು

ಅಣ್ಣ ಆಯಿಯ ನಡುವೆ
ಒದ್ದೆಯಾದ
ಜೀನ್ಸ್ ಹುಡುಗನ
ಬಿಸಿಯುಸಿರು ಬಡಿದು
ಕೋಣೆಯ ಗೋಡೆ ಬಿರುಕು ಬಿಡುವವು!